ألف باء e-Learning !

فجأة وبدون أى مقدمات بقى مطلوب من ميس سارة مدرسة العربي فى المدرسة الانترناشيونال انها تكمل المنهج للأولاد وهم قاعدين فى بيوتهم اونلاين..

طيب ايه معلومات ميس سارة عن ال e-Learning ؟

ميس سارة حضرت محاضرة فى المدرسة مدتها أربع ساعات اداها لها مدير قسم ال IT فى المدرسة ما فهمتش منها اى حاجة غير انه الموضوع مكلكع جدا ومش هتعرف تعمله !

طيب علشان ميس سارة واللى زيها خلينا نحاول نبسط الموضوع ونتكلم ييساطة ايه موضوع ال e-learning ده وازاى نشتغله واحنا فاهمين من غير الدخول فى تفاصيل معقدة..

الاول: يعنى ايه أصلا e-Learning ؟

ال e-learning أو عملية التعلم الإلكترونى هى عملية تعلم شبه اللى بيحصل بالضبط داخل الفصل يعنى عملية لها أهداف ومخرجات تعلم ولها منهجية تعلم لكن الفرق انها بتحصل باستخدام وسائل الكترونية من غير ما يتواجد المعلم والمتعلم فى نفس المكان

طيب هل فيه أنواع لل e-Learning ولا هو حاجة واحدة؟

ممكن نقول انه فيه نوعين من ال e-Learning

الأول هو التعلم الإلكترونى المتزامن Synchronous e-Learning

والثانى هو التعلم الإلكترونى غير المتزامن Asynchronous e-Learning

فى النوع الأول (المتزامن) بيكون المعلم موجود مع المتعلمين فى نفس الوقت فى بث مباشر بيقدر يناقشهم ويرد على أسئلتهم فى نفس الوقت

فى النوع الثانى (غير المتزامن) بيكون المعلم مجهز محتوى علمى مصور أو مكتوب وبيبعته للمتعلمين علشان يتفرجوا عليه أو يذاكروه من غير ما المعلم نفسه يكون متواجد فى نفس اللحظة

طيب ازاى أستخدم النوع الأول (التعلم الإلكتونى المتزامن) لشرح المنهج بتاعى؟

المطلوب ببساطة هو انك تحضر الدرس كأنك هتديه داخل الفصل بس بدل ما تلبس وتروح المدرسة هتفتح اللابتوب بتاعك وتفتح برنامج مخصص للغرض ده (زى برنامج زووم مثلا) وتتأكد انه كاميرا اللابتوب شغاله والصوت واضح وتبدأ الدرس

طيب هو برنامج زووم ده عبارة عن ايه؟

برنامج زووم أو أى برنامج تانى مخصص للغرض ده هو تطبيق عامل زى الواتساب كده بس بدل ما يبعت رسائل هو بيعمل بث فيديو مباشر ليك علشان الطلبة بتوعك يقدروا يشوفوك كأنك فى الفصل قدامهم وتقدر من خلال البرنامج انك تفتح مناقشات مع الطلبة وهم يردوا باستخدام المايك بتاعهم وهم يقدروا يكتبوا أسئلة على الشات وانت تجاوب عليها

طيب ازاى بقى أستخدم النوع الثانى (التعلم الإلكترونى غير المتزامن) مع الطلبة بتوعى؟

استخدام النوع ده عامل زى عملية تجهيز كوباية الشاى .. علشان تشرب شاى انت محتاج حاجتين .. الكوباية نفسها اللى هتصب فيها الشاى ومكونات الشاى (مياه سخنة .. شاى .. سكر) .. نفس الكلام فى النوع ده من التعلم .. انت محتاج وعاء اللى هو شبه الكوباية فى المثال بتاعنا الوعاء ده بنسميه ال Learning Management System أو اختصارا ال LMS .. ومحتاج المحتوى اللى هتحطه جوه الوعاء ده وده ممكن يكون فيديوهات انت مسجلها بالموبايل أو ملفات pdf أو word هتطلب من الطلبة يتفرجوا عليها أو يقروها أو يطبعوها ويحلوها

وجود الوعاء LMS بيسمح للمعلم انه يتابع الطبلة بتوعه مين دخل حمل الملفات أو اتفرج على الفيديوهات ومين لأ .. بيسمح كمان بعمل امتحانات على السيستم نفسه يدخل الطالب بال user بتاعه يحلها ده غير انه بيكون فيه مساحات للنقاش discussion forums ممكن المعلم يفتح موضوع للمناقشة والطلبة يدخلوا يكتبوا ردودهم وكمان ممكن المعلم يطلب مشروع من الطلبة بتوعه وهم يدخلوا يرفعوه فى مكان معين على السيستم

واحد من أشهر أمثلة ال LMS المستخدمة فى التعليم هو Google Classroom واللى بيدى كثير من المميزات اللى قلناها دى

فيه شكل ثانى من التعليم غير المتزامن وده بيستخدم أكثر فى التعليم الجامعى من خلال مواقع زى Coursera و LinkedIn Learning واللى بيكون فيها كورسات كاملة عبارة عن سلسلة من الفيديوهات وسطها امتحانات قصيرة وواجبات بيعملها المتعلم Assignments وامتحان نهائى أو مشروع .. حاليا فى وطننا العربى فيه مواقع عربية زى إدراك والمنتور وليرنخانه بتقدم النوع ده من التعلم ..

دى كده كانت بعض المفاهيم الأساسية عن ال e-Learning وأنواعه حاولت انها تكون بشكل بسيط قدر الإمكان علشان يستفيد منها العاملين فى مجال التعليم والتدريب خصوصا اللى الموضوع جديد بالنسبة لهم

ياريت اللى يعرف حد شغال فى مجال التعليم ممكن يكون الكلام ده مفيد بالنسبة له يبعتهوله علشان الكل يستفيد

#eLearning

#التعليم_الإلكتروني

أحمد غيتة

Ahmad Gheita