البرمجة اللغوية العصبية NLP

كذا حد سألني هو ايه ال NLP ده 🙂
ولذلك ده بوست بسيط توضيحي له والله الموفق والمستعان 😀

* ايه هو معنى NLP ؟؟
ده اختصار ل Neuro-Linguistic Programing أو البرمجة اللغوية العصبية

* يعني ايه NLP واقدر استخدمه في ايه وإزاي ؟؟
ربنا سبحانه وتعالى خلق كل عضو في جسمنا له وظيفة بيقوم بيها ، وأهم عضو والمسئول عن كل حاجة تقريبا هو العقل
ال NLP عبارة عن طرق وأساليب باستخدمها في إني أقدر اتحكم في طريقة التفكير اللي عقلي بيفكر بيها ، بأقدر أكون واعية وشايفة ازاي عقلي الواعي واللاواعي بيفكر والأفكار ديه جت منين

هو دراسة للعقل وللجهاز العصبي ، ودراسة اللغة اللي العقل بيتكلم بيها وإزاي يحقق اللي هو عايزه

هو كمان دراسة إزاي العقل بيتأثر بالمدخلات اللي بتدخله من برة (أفكار – ذكريات – مشاعر  … ) وإزاي بتأثر على سلوكنا وتصرفاتنا

بتُستخدم مثلا لو انا عندي مخاوف أو باخد قرارات مش مظبوطة أو عندي أفكار سلبية عن نفسي أو اللي حواليا أو لو عندي ضعف شوية في التعامل مع اللي حواليا إزاي ممكن اخليه أحسن ……..

ال techniques بتاعت NLP  ممكن تساعدني أنا نفسي للتغيير للأفضل كمان ممكن اساعد بيها غيري بردوا للتغيير للأفضل

* هتفيد في ايه ومين اللي ممكن ياخدها ؟؟؟

– أي حد ممكن ياخدها هيقدر يساعد نفسه إن حياته تكون أفضل من خلال التفكير بجودة أعلى وبشكل أفضل ويقدر إنه يتغير للأفضل

– لو عايز تفهم الناس من حواليك وإزاي تتعامل معاهم ، وإزاي تتعامل مع الناس اللي شبهك واللي مختلفين عنك

– عايز تتحكم في قراراتك وإنك تدير حياتك بشكل أفضل

– عندك عقبات دايما بتوقفك وعايز تتعامل معاها علشان تقدر تكمل في حياتك

– كوتش أو عايز تبقى كوتش ده هيكون أساسي إنك تتعلمه وتتقنه

من وجهة نظري الشخصية إنه هيخلي حياتك أكثر هدوءاً وسلاماً ^_^

يارب أكون قدرت أوضح جزء من الصورة

طبعا لو حد من أصدقائي الأعزاء ممن هم على دراية بال NLP عنده إضافة أو تعديل ياريت ميحرمناش منها ^_^

ودمتم بخير وسعادة ورضا 😊🙏

ناريمان البغدادي