- 03 Jul, 2023
- 0 Comments
- 13 Secs Read
٣٠ حقيقة حول التدريب في مصر
١-مفيش حاجة أسمها Mini MBA للأسف (Sad but true).
٢-منحة يعني هدية مش يعني تخفيض ، منحة بنص التمن ديه أشتغالة
٣-الطاقة و التنويم بالايحاء و ما شابه ياتدرسوا مع حد فاهم و دارس كويس يا متفكرش فيه أساسا (الفتيّ فيه كتير
٤-الفرق بين ال Trainer و ال Coach زي الفرق بين ال B و ال P , ديه شغلانة و دي شغلانة
٥-الكورسات المعتمد شهادتها من جامعة عين شمس و ووزارة الخارجية ديه أكبر سبوبة موجودة في السوق ، الجهات دي بتعتمد أي حاجة حتي شهادة الميلاد
٦-مافيش حاجة أسمها ماچستير أو دكتورة في التنمية البشرية.
٧-خبير التنمية البشرية هو لقب جزافي ملهوش أي Qualifications حقيقية.
٨-مافيش حاجة أسمها جمعية مدربي التنمية البشرية.
٩-٥٠٪ من اللي شغالين في المجال بيعانوا من ال ٥٠٪ التانين.
٩-الدكتور أبراهيم الفقي (رحمة الله) مش هو اللي عمل التنمية البشرية ، هو نقلها و نشرها في الوطن العربي.
١٠-الدكتور أبراهيم الفقي (رحمه الله) مات و الله و مش بيعمل منح ، الناس اللي بتتمحك فيه لو كان عايش أكيد كان هيتبرأ منهم.
١١-اللي شغالين في المجال بأحتراف بيتريقوا علي كلمة تنمية بشرية زيك بالظبط.
١٢-الدين داخل في كل حاجة في حياتنا بس التدريب مش دروس دين.
١٣-التنمية البشرية معناها (تنمية و تطوير) لأي حاجة تخص البشر يعني لو قريت كتاب أنت كده نميت نفسك.
١٤-البرمجة اللغوية العصبية متحضرهاش غير مع متخصص بجد.
١٥-مش كل اللي بيطلعوا في التلفزيون فاهمين ، ومش كل اللي ميطلعوش مش فاهمين.
١٦-مافيش حاجة أسمها كورس إعداد المدرب الدولي.
١٧-المدرب الدولي بيبقي دولي لما بيحاضر في كذه دولة مش القاهرة و أسكندرية و أسيوط.
١٨-مدرب الشباب ، نسر التنمية البشرية ، عمدة المدربين العرب ، كبيرة مدربات مصر، رئيس مدربي الجمعية العالمية ،صاروخ الالتفافات الدولية …ليه طيب !؟ بجد ليه!
١٩-ال corporate trainers ملهومش أي علاقة بالعك اللي فات.
٢٠-المركز الثقافي ال….مش بتاع كورسات ، بتاع تخفيضات.
٢١-الأكاديمية الدولية العالمية النملية غالباً بتكون حاجة تحت السلم.
٢٢-التدريب و التطوير مش one time event , كمّل.
٢٣-أرجوك متسخسرش الفلوس في نفسك.
٢٤-المدتيشين و اليوجا حاجات لازم تجربها.
٢٥-عيش بالأمل عيش بالنجاح عيش بالكفاح زبادي بالتفاح قفل ومفتاح فرحة و انشكاح ، الكلام ده ملوش علاقة بالتدريب.
٢٦-فيه ناس شغالة في ادارة التدريب و التطوير في شركات كبيرة أرجوك متقلش أدامهم ‘تنمية بشرية’.
الأربع نقط اللي فاضلين مش هتقرأهم دول هتحسهم بقلبك لما تشعر أنك انسان لماح ، قول أنا لماح ، أنا لماح، أنا لماح ، دلوقتي قول لا يوجد لغز بدون مفتاح. بس تمام دلوقتي تقدر تدخل في كينونة المجرة المستنرية و تطلع من جسدك و تشوفهم بأعماقك لما تتنفس شهيق الأمل وتطلع زفير الملل.